គ្រោះ​ជាន់​លើ​គ្រោះ​! បុណ្យសព​ម្តាយ​៧​ថ្ងៃ​មិន​ទាន់​ចប់​ផង ស្រាប់តែ​រលំ​ផ្ទះ​ទៀត

ខេត្តកំពង់ឆ្នាំង ៖ មនុស្សក្មេងចាស់ចំនួន៦នាក់បានរងរបួសធ្ងន់ និងស្រាល ក្នុងហេតុការណ៍រន្ធត់មួយ បណ្តាលផ្ទះមួយខ្នងបានបាក់ធ្លាក់ដល់ដី ហេតុការណ៍យ៉ាងអាក្រក់នេះបង្កការភ្ញាក់ផ្អើលកាលពីវេលាម៉ោង៤និង៤០នាទីល្ងាច ថ្ងៃទី០១ ខែកក្កដា ឆ្នាំ២០១៧ នៅភូមិគោកស្តៅ ឃុំទឹកហូត ស្រុករលាប្អៀរ ។

អ្នករងរបួសខាងលើ
១-ឈ្មោះ សារី សៀវ អាយុ៥៣ឆ្នាំ
២-ឈ្មោះ ផា រី ភេទស្រី អាយុ២៧ឆ្នាំ ជាប្រពន្ធម្ចាស់ផ្ទះ
៣-ឈ្មោះ ឈុន វ៉ា អាយុ៥៨ឆ្នាំ
៤-ឈ្មោះ តាន់ ឆានុន អាយុ១០ឆ្នាំ ។ (អ្នកទាំង៤នាក់នោះកំពុងសម្រាកព្យាលបាលនៅមន្ទីរពេទ្យ)
៥-កុមារីឈ្មោះ ផាន់ នី អាយុ១៣ឆ្នាំ របួសធ្ងន់ដោយដាច់ដៃស្តាំ និងបែកក្បាល
៦-កុមារាឈ្មោះ មាន ម៉ៃប្រូ អាយុ១២ឆ្នាំ រងរបួសធ្ងន់ដោយបាក់ជើងទាំងពីរ និងបែកក្បាល ។
ចំណែកម្ចាស់ផ្ទះឈ្មោះ ប៉ែន ស៊ីន អាយុ៥១ឆ្នាំ រីឯការខូចខាតដូចជា ផ្ទះឈើមួយខ្នងប្រក់ដំបូលស៊ូប្រូស៊ីម៉ង់ដ៍ មានទំហំ៧គុណ៩ម៉ែត្រ ខូចម៉ូតូ២គ្រឿង និងសម្ភារមួយចំនួនដូចជាទូរទស្សន៍ គ្រែ កង់ និងរបស់របរមួយចំនួនទៀត ។

តាមការរៀបរាប់ពីបុរសម្ចាស់ផ្ទះឱ្យដឹងថា មុនពេលកើតហេតុគ្រួសារគាត់កំពុងធ្វើពិធីសព៧ថ្ងៃឱ្យម្តាយដែល ចែកឋានទៅ ល្ងាចនោះមានភ្លៀង និងខ្យល់ខ្លាំង ហើយភ្ញៀវមួយចំនួនទៅផ្ទះវិញ ឯមួយចំនួនទៀតនៅជ្រកក្នុងរោងបុណ្យ ចំណែកខ្លះទៀតនៅលើនិងក្រោមផ្ទះ ស្រាប់តែរំពេចនោះខ្យល់យ៉ាងខ្លាំងបានបក់មកពីទិសខាងលិចចំផ្ទះគាត់ បណ្តាលឱ្យដួលរលំជាមួយជើងតាងកម្ពស់៣,៥០ម៉ែត្រធ្លាក់មក ខណៈនោះអ្នកខ្លះដឹងទាន់ក៏ស្ទុះចេញ តែនៅសល់ខ្លះបណ្តាលឱ្យរងរបួសធ្ងន់-ស្រាល៦នាក់ តែខ្លះទៀតសំណាងល្អនៅចំប្រឡោះប្រហោងផ្ទះ ទើបមិនអីបានវារចេញពីក្រោមផ្ទះទាំងព្រលឹងចុងសក់ ។

ទោះយ៉ាងណាក្តី ពិធីបុណ្យសព៧ថ្ងៃរបស់គ្រួសារខាងលើនេះ នៅតែបន្តធ្វើដល់ព្រឹកថ្ងៃទី០២ទៀត ក្រោមក្តីក្តុកក្តួល និងសំណូមពរពីម្ចាស់ផ្ទះសុំក្តីមេត្តាជួយគ្រួសារគាត់ផង ព្រោះម្តាយទើបស្លាប់បាន៧ថ្ងៃ ពេលនេះខ្យល់បោករលំផ្ទះទៀត រីឯប្រពន្ឋនិងកូនកំពុងសម្រាកនៅមន្ទីរពេទ្យ ពិតជាវេទនាណាស់ !