ពិភពចែករំលែក - World Share: April 2017

បើកបរសូមប្រុងប្រយ័ត្នជានិច្ច! ស្លាប់៤នាក់ និង៧នាក់របួសធ្ងន់ស្រាល ក្នុងគ្រោះថ្នាក់ចរាចរណ៍ដ៏រន្ធត់ លើផ្លូវជាតិលេខ៥ ស្រុកសាមគ្គីមានជ័យ

ខេត្តកំពង់ឆ្នាំង ៖ យ៉ាងហោចណាស់មនុស្ស៤នាក់ស្លាប់ និង៧នាក់ផ្សេងទៀតរងរបួស ក្នុងហេតុការណ៍គ្រោះថ្នាក់ចរាចរណ៍ រវាងរថយន្ដ Camry បុកជាមួយរថយន្ដក្រុងដឹកអ្នកដំណើរ រួចបន្ដទៅបុករថយន្ដធុនធំមួយគ្រឿងទៀត នៅម៉ោង១០៖១០នាទីយប់ ថ្ងៃទី២៩ ខែមេសា ឆ្នាំ២០១៧ តាមបណ្ដោយផ្លូវជាតិលេខ៥ ចន្លោះគីឡូម៉ែត្រលេខ៤៨-៤៩ ស្ថិតក្នុងភូមិស្ពានពោធិ ឃុំសេដ្ឋី ស្រុកសាមគ្គីមានជ័យ។

របាយការណ៍របស់នគរបាលចរាចរណ៍បញ្ជាក់ថា មុនពេលកើតហេតុ ឃើញរថយន្តម៉ាក TOYOTA CAMRY ពណ៌ប៉ៃតងចាស់ ពាក់ផ្លាកលេខ ភ្នំពេញ 2A-5416 បើកបរដោយ បុរសម្នាក់ឈ្មោះ ផន ភារី អាយុ២២ឆ្នាំ ក្នុងទិសដៅពីជើងទៅត្បូង ដោយមានដឹកអ្នកដំណើរ ជាក្រុមគ្រួសារចំនួន៧នាក់ (ស្រី៣នាក់) បានបើកវ៉ារថយន្តដឹកទំនិញធុនធំ១គ្រឿង ស្រាប់តែទៅបុករថយន្តក្រុងម៉ាក HYUNDAI ពណ៌ស-ខៀវ ពាក់ផ្លាកលេខ ភ្នំពេញ 3C-9712 ក្នុងទិសដៅច្រាស់គ្នា ហើយក៏បានខ្ទាតទៅបុករថយន្តធំ១គ្រឿងទៀត ម៉ាក FUSO ពណ៌ស្លែ ពាក់ផ្លាកលេខតាកែវ 3A-0590 ដែលកំពុងបើកបរមកពីក្រោយរថយន្តម៉ាក CAMRY ទើបរថយន្ដទៅមុខលែងរួច។

ក្នុងហេតុការណ៍ដ៏អាក្រក់នេះ បានសម្លាប់មនុស្ស៤នាក់ (ស្រីម្នាក់) របួសធ្ងន់ស្រាល៧នាក់ (ស្រី៤នាក់) និងខូចខាតរថយន្ត៣គ្រឿង។

ក្រោយកើតហេតុសមត្ថកិច្ចបានប្រគល់សព ទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី។ ចំណែកឯវត្ថុតាងយកមករក្សាទុក នៅអធិការដ្ឋាននគរបាលស្រុកសាមគ្គីមានជ័យ ដើម្បីដោះស្រាយតាមច្បាប់៕

ជួយ Share បន្តផង! ប្អូនស្រី រក្សា អាយុ១៥ឆ្នាំ បានបាត់ចេញពីផ្ទះ ៣ថ្ងៃហេីយ ខណៈនេះអ្នកផ្ទះកំពុងតាមរក!

បេីតាមម្ចាស់ Account Facebook ឈ្មោះ "Srey Touch" បានផុសជាសារធារណៈថា បានបាត់ក្មួយស្រីចេញពីផ្ទះនៅម្ដុំអូរឬស្សី បាត់ដំណឹងមិនអាចទាក់ទងបាន តាំងពីថ្ងៃ27 រហូតដល់ថ្ងៃទី30 ខែមេសា ២០១៧នេះ នៅមិនទាន់រកឃើញទេ ដែលមានរូបដូចខាងក្រោមនេះ ៖

បើមានបងប្អូនណាបានជួបឬបានស្គាល់

សូមទាក់ទងតាមលេខ

077377937
012353095

សូមជួយ Share ឆាប់រកឃើញនាងវិញផង!សូមអរគុណ! (03:08am 30-04-2017)

ផ្លូវស្ទះពេក បុរសម្នាក់បើករថយន្ត Pirus យ៉ាងលឿនវ៉ាគេឯង ចុងក្រោយបើកឡើងទៅឈរលើទ្រូងផ្លូវស្អាត

រាជធានីភ្នំពេញ: យុវជនម្នាក់បើកបររថយន្តមួយគ្រឿងម៉ាក កាមរីព្រូស ក្នុងល្បឿនលឿនមិនប្រយ័ត្នជ្រុលរេចង្កូតបុកឡើងរបាំងថ្មពុះចែកទ្រូងផ្លូវ បញ្ឈរកង់២ឡើងលើ បណ្តាលអោយរងការខូចខាតទាំងរថយន្ត និងរបាំងថ្ម នៅចំណុចក្បែរស្តុបទេពផន ស្ថិតតាមបណ្តោយផ្លូវម៉ៅសេទុង ក្នុងសង្កាត់ផ្សារដេប៉ូ១ ខណ្ឌទួលគោក នាវេលាម៉ោង២០និង០០នាទីយប់ថ្ងៃទី២៩ ខែមេសា ឆ្នាំ២០១៧នេះ ។

រថយន្តបង្កហេតុម៉ាក កាមរីព្រូស ពណ៌ស ពាក់ស្លាកលេខ បាត់ដំបង 2B-1546 បើកបរដោយយុវជនម្នាក់វ័យប្រមាណ២០ឆ្នាំ ។

ប្រភពអោយដឹងថា យុវជនខាងលើបើកបររថយន្ត តាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើង ក្នុងល្បឿនលឿនគួរសម លុះមកដល់ចំណុចខាងលើ ទំនងជាវ៉ានឹងអ្វីមួយដែលនៅពីមុខខ្លួន ស្របពេលនោះចរាចរណ៍នៅទីនោះកំពុងស្ទះ ក៏ស្រាប់តែ ជ្រុលចង្កូតបុកកំរោលឡើងបញ្ឈរជើង២លើក្បាលនាគពុះចែកទ្រូងផ្លូវតែម្តង ។

ក្នុងគ្រោះថ្នាក់ខាងលើនេះ បានបណ្តាលអោយក្បាលនាគពុះចែកទ្រូងផ្លូវត្រូវរងការខូចខាតដាច់ចេញពីគ្នាដោយឡែករថយន្ត ត្រូវរងការខូចខាតផ្នែកខាងមុខ គួរសម ។

ក្រោយកើតហេតុសមត្ថកិច្ចមូលដ្ឋាន រួមជាមួយនគរបាលជំនាញចុះអន្តរាគមន៍ វាស់វែងស្ទូចយករថយន្តខាងលើទៅរក្សាទុកនៅការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ រង់ចាំបន្តនីតិវិធីច្បាប់ ៕

រូបភាពពី ៖ ដំណឹងយប់មិញ

ABC Breaking News : គ្រោះថ្នាក់ដ៏សាហាវរថយន្ត៤គ្រឿងបុកបន្តគ្នាពេញទំហឹង មានអ្នកស្លាប់៣នាក់ របួសធ្ងន់គៀបជាប់ក្នុងឡានជាច្រេីននាក់ទៀត នៅស្ពានពោធ៍ ខេត្តកំពង់ឆ្នាំង

ខេត្តកំពង់ឆ្នាំង ៖ ប្រភពព័ត៌មានបឋមពីកន្លែងកើតហេតុបានប្រាប់ឲ្យវិទ្យុABCដឹងថា មានករណីគ្រោះថ្នាក់ចរាចរណ៍ដ៏រន្ធត់ទៀតហេីយ ដោយរថយន្ត៤គ្រឿងបុកគ្នាពេញទំហឹង មានអ្នកស្លាប់៣នាក់ និងគៀបជាប់នឹងរថយន្ត និងរងរបួសធ្ងន់ជាច្រេីននាក់ទៀត មានក្មេងចាស់ ប្រុសស្រី ស្ថិតនៅតាមបណ្តោយផ្លូវជាតិលេខ៥ នៅចំណុចស្ពានពោធ៍ ស្រុកសាមគ្គីមានជ័យ ខេត្តកំពង់ឆ្នាំង ។

ករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅវេលាម៉ោងជិត១០៖២០នាទីយប់ ង្ងៃទី២៩ ខែមេសា ឆ្នាំ២០១៧នេះ រថយន្តទាំង៤គ្រឿងនេះ សមត្ថកិច្ចមិនទាន់អះអាងថា រថយន្តមួយណាខុស ឬត្រូវទេ។ (ព័ត៍មានបន្ថែមABCនឹងជម្រាបជូនបន្ត)