ខេត្តបាត់ដំបង ៖ ជនដៃដល់ជាក្រុមចោរប្លន់បាញ់សំលាប់អ្នកគួកជេរម៉ូតូចំនួន២នាក់យ៉ាងសាហាវនៅស្រុកបវេល ខេត្តបាត់ដំបងកាលពីម្សិលមិញ ត្រូវបានសមត្ថកិច្ចចាប់ខ្លួនបានម្នាក់ហើយ។ចំណែកបក្ខពួកម្នាក់ទៀតដែលជាម្ចាស់កាំភ្លើងបានរត់គេចខ្លួនជាមួយនឹងម៉ូតូរបស់ជនរងគ្រោះ ដោយពេលនេះសមត្ថកិច្ចកំពុងតាមចាប់ខ្លួនជាបន្តទៀត។
ជនសង្ស័យដែលសមត្ថកិច្ចខេត្តបាត់ដំបងចាប់ខ្លួនបាននេះ មានឈ្មោះ យិន សារេន ភេទប្រុស អាយុ៦៦ឆ្នាំ រស់នៅភូមិព្រះពន្លា ឃុំរូងជ្រៃ ស្រុកថ្មគោល ខេត្តបាត់ដំបង ត្រូវជាពូ និងជនសង្ស័យដែលរត់គេចខ្លួន មានឈ្មោះ អួន.សៅ (មុខសញ្ញាចាស់)ត្រូវជាក្មួយរបស់ឈ្មោះយិន សារេន។
តាមចម្លើយសារភាពរបស់ឈ្មោះ យិន.សារេន បាននិយាយថា កាលប្រហែលមួយខែមុន ខ្លួននិងឈ្មោះ អួន.សៅ មានបំណងចង់ប្លន់គេនៅភូមិតាគ្រាម ឃុំតាក្រាម ស្រុកបាណន់ ម្តងរួចមកហើយក៏ប៉ុន្តែមិនបានសម្រេច។ លុះដល់ថ្ងៃ០៧ ខែកក្កដា ឆ្នាំ២០១៧ ឈ្មោះ អួន.សៅ និងខ្លួនបានរៀបគំរោងប្លន់អ្នកគួកជេរម៉ូតូ ប៉ុន្តែអ្នកគួកជេរនោះទិញម៉ូតូបាន ០១គ្រឿងហើយក៏ផ្អាកវិញដោយ សន្យាថាចាំថ្ងៃច័ន្នចាំជួបគ្នា។លុះដល់ថ្ងៃ១០ ខែកក្កដា ឆ្នាំ២០១៧ ខ្លួនបានទូរស័ព្ឌទៅអ្នកគួកជេរដើម្បីហៅមកទិញម៉ូតូ ពេលជួបគ្នា ហើយខ្លួនក៏នាំអ្នកទិញម៉ូតូទៅកន្លែងដែលបានណាត់ជួបជាមួយឈ្មោះ អួន.សៅ ហើយក៏បានធ្វើសកម្មភាពបាញ់សម្លាប់ប្លន់យកម៉ូតូតែម្តង។ចំណែកឈ្មោះអួន សៅ ក្រោយប្លន់បានហើយក៏យកកាំភ្លើង និងម៉ូតូរបស់ជនរងគ្រោះជិះគេចខ្លួនបាត់ទៅ។
សូមបញ្ជាក់ថាកាលពីព្រឹកថ្ងៃទី១០ ខែកក្កដា ឆ្នាំ២០១៧ម្សិលមិញនេះ សាកសពមនុស្សប្រុសចំនួន២នាក់ត្រូវបានគេប្រទះឃើញ បង្កអោយមានការភ្ញាក់ផ្អើលយ៉ាងខ្លាំង ដែលករណីនេះស្ថិតត្រង់ចំណុចក្បាលអាងសំរោង ក្នុងភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង។ តាមសេចក្តីរាយការណ៍បានអោយដឹងថា ជនរងគ្រោះទាំង២នាក់ ត្រូវបានគេស្គាល់និងដឹងថា ម្នាក់ឈ្មោះហួត ឈឿង អាយុ៤៥ឆ្នាំជាអ្នកគួកជេរម៉ូតូ និងម្នាក់ទៀតឈ្មោះរិទ្ធ បានជិះម៉ូតូឌុបគ្នាមកពីមើលម៉ូតូគេលក់នៅកន្លែងកើតហេតុខាងលើ ។ ជនរងគ្រោះទាំង២នាក់ មានទីលំនៅក្នុងភូមិជីនាង ឃុំគោកឃ្មុំ ស្រុកថ្មគោល ។
ចំពោះមូលហេតុ ត្រូវសមត្ថកិច្ចដាក់ការសង្ស័យ ជាករណីប្លន់យកម៉ូតូ ព្រោះនៅមុនពេលកើតហេតុ គេបានឮស្នូរសំឡេងគ្រាប់កាំភ្លើងផ្ទុះ ក្រោយមកមានពលរដ្ឋបានដើរទៅក្បែរ កន្លែងសំឡេងផ្ទុះនោះ ក៏ប្រទះឃើញសាកសពទាំង២នាក់ និងបានបាត់ម៉ូតូទៀតផង៕
(រូបពាក់អាវក្រឡា ជាចោរប្លន់សម្លាប់ដែលត្រូវសមត្ថកិច្ចចាប់បានមានឈ្មោះ យិន សារេន)
ទស្សនាវិដេអូខាងក្រោម
