រាជធានីភ្នំពេញ : បង្គន់អនាម័យចំនួន២០ បន្ទប់ងូតទឹក២៧បន្ទប់រួមទាំង បណ្តាញទឹក និងតភ្លើងអគ្គិសនីផងត្រូវបានអាជ្ញាធររាជធានីភ្នំពេញបាននិងកំពុងតម្លើងនិងតនៅ តាមផ្ទះស្នាក់នៅបណ្តោះអាសន្នទាំង១៥៣គ្រួសារនៅក្រោមស្ពានអាកាសស្ទឹងមានជ័យ ក្រោយពីផ្ទះបណ្តោះអាសន្ននេះបានស្ថាបនារួចរាល់។
មន្ត្រីរដ្ឋបាលរាជធានីភ្នំពេញបានអោយដឹងថា បន្ទាប់ពីបានសង់ផ្ទះបណ្តោះអាសន្នជូនប្រជាពលរដ្ឋ ១៥៣គ្រួសារដែលត្រូវរើចេញពីប្រឡាយស្ទឹងមានជ័យរួចរាល់ ថ្ងៃទី០៨ធ្នូនេះ ក្រុមការងារបានចុះរៀបចំការតម្លើងបង្គន់ចំនួន ២០បង្គន់ បន្ទប់ងូតទឹកចំនួន ២៧បន្ទប់ តបណ្តាញទឹក និងតភ្លើងអគ្គិសនីតាមផ្ទះ ដើម្បីដាក់អោយប្រើប្រាស់ដោយឥតគិតថ្លៃក្នុងរយៈពេលសាងសង់ប្រឡាយបេតុង។
លោកឃួង ស្រេង អភិបាលនៃគណៈអភិបាលរាជធានីភ្នំពេញ បានប្រាប់ប្រជាពលរដ្ឋកន្លងមកនេះថា ប្រជាពលរដ្ឋរស់នៅតាមប្រឡាយស្ទឹងមានជ័យជាង១៥៣គ្រួសារនឹងត្រូវបញ្ជូនមកស្នាក់នៅ ផ្ទះទំហំ៤គុណ៦ម៉ែត្រ មានផ្លូវមុខ ក្រោយមានទឹកភ្លើងនិងបង្គន់អនាម័យ ជាបណ្ណោះអាសន្ននៅក្រោមស្ពានអាកាសស្ទឹងមានជ័យ។
លោកបន្យថា ជាជំហានទី១ យ៉ាងយូរយៈ ពេល១ខែ អាជ្ញាធររាជធានីភ្នំពេញនឹងផ្តល់បណ្ណ័កម្មសិទ្ធស្របច្បាប់ជូនដល់បងប្អូនប្រជាពលរដ្ឋនៅសហគមស្ទឹងមានជ័យនេះតែម្តង។
ជាគម្រោងនៅពេលដែលការស្ថាបនាប្រឡាយនិងផ្លូវអមសងខាងប្រឡាយនេះ ស្ថានាបានរួចរាល់ រដ្ឋបាលរាជធានីភ្នំពេញ នឹងរៀបចំតបណ្តាញទឹកស្អាត ភ្លើងអគ្គីសនីចូលផ្ទះប្រជាពលរដ្ឋ រួមនឹងការដាក់បង្កោលភ្លើងសាធារណៈនៅលើផ្លូវនេះថែមទៀត ដើម្បីអោយតំបន់នេះក្លាយជាទីក្រុងស្ទឹងមានជ័យ ។
មន្ត្រីរដ្ឋបាលរាជធានីភ្នំពេញបានអោយដឹងថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត ។
ប្រឡាយស្ទឹងមានជ័យនេះបានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕
