ខេត្តបាត់ដំបង៖ បុរសម្នាក់ត្រូវបានកម្លាំងសមត្ថកិច្ចធ្វើការឃាត់ខ្លួន ក្រោយយុវជនរូបនោះបានថតវីដេអូបង្ហាញសកម្មភាពខ្លួនឯងកំពុងតែជក់ថ្នាំ ហើយបង្ហោះបង្អួតគេឯងតាមហ្វេសប៊ុកថែមទៀតផង។ ជនសង្ស័យត្រូវបានសមត្ថកិច្ចធ្វើការឃាត់ខ្លួនកាលពីវេលាម៉ោង១១ថ្ងៃត្រង់ ថ្ងៃទី២៣ ខែកក្កដា ឆ្នាំ២០១៧ ស្ថិតនៅផ្ទះរបស់ជនសង្ស័យ នៅភូមិចំការសំរោង១ សង្កាត់ចំការសំរោង ក្រុងបាត់ដំបង ខេត្តបាត់ដំបង។
ជនសង្ស័យមានឈ្មោះ សុខ ពិតប្រាកដ ហៅតឿ អាយុ២៥ឆ្នាំ រស់នៅភូមិ-ឃុំខាងលើ ហើយជនសង្ស័យបានថតបង្ហោះវីដេអូជក់ថ្នាំញៀននេះនៅលើគណនីហ្វេសប៊ុរបស់ខ្លួនឈ្មោះ Pa Sethyka កាលពីថ្ងៃទី២២ ខែកក្កដា ឆ្នាំ២០១៧។ ក្រោយឃើញឃ្លិបវីដេអូនោះបាន១ថ្ងៃ លោកស្នងការខេត្តបានបញ្ជាឲ្យធ្វើការស្រាវជ្រាវរហូតឈានដល់ការឃាត់ខ្លួនតែម្តង។ ក្នុងប្រតិបត្តិការឃាត់ខ្លួន កម្លាំងសមត្ថកិច្ចបានធ្វើការឆែកឆេររកឃើញគ្រឿងញៀនមេតំហ្វេតាមីន ICE (ម៉ាទឹកកក) ចំនួន៧ថង់ មានទម្ងន់២២,២៦ក្រាម ជញ្ជីងសម្រាប់ថ្លឹងថ្នាំញៀន១ សម្ភារសម្រាប់ជក់ថ្នាំ និងវត្ថុតាងមួយចំនួនទៀត។
ក្រោយធ្វើការឃាត់ខ្លួន សមត្ថកិច្ចបានបញ្ចូនជនសង្ស័យទៅការិយាល័យប្រឆាំងគ្រឿងញៀនហើយ ដើម្បីសួរនាំ និងកសាងសំណុំរឿងបញ្ជូនទៅតុលាការ៕
ប្រភពពី ៖ ខ្មែរណូត