ក្មេងបែកស្លុយគឺជាមេរោគបំពុលសង្គមឬ? ពាក្យថា បែកស្លុយ ត្រូវប្រើប្រាស់ក្នុងន័យហៅទៅលើក្រុមក្មេងស្ទាវណាដែលតែងតែចូលចិត្ត ដើរលេងច្រើន គេចរៀនមិនចូលសាលា ចូលឌីស្កូក្លឹប ដើរដាច់យប់ មិនចូលផ្ទះ ប្រើប្រាស់ថ្នាំញៀន ទំនើង ផឹកស្រា ពពាក់ពពូនស្រីប្រុស គ្មានសីលធម៌ ...ល...

មួយរយៈប៉ុន្មានឆ្នាំចុងក្រោយនេះ កម្ពុជាយើង​មានការប្រើប្រួលច្រើន ទាំងវប្បធម៌ សិល្បះ ប្រពៃណី ទំនៀមទំលាប់ បច្ចេកវិទ្យា សេដ្ឋកិច្ច នយោបាយ -ល-។ បើយើងសម្លឹង​ទៅមើល​ការប្រែប្រួល​ផ្នែកសិល្បះ ប្រពៃណី និងបច្ចេកវិទ្យាវិញ យើងឃើញថា​មានការប្រែប្រួល​ច្រើនខ្លាំងណាស់ ដូចជាការតុបតែងខ្លួន​របស់យុវវ័យ បទចម្រៀង​សម្រាប់រាំលេងកំសាន្ត ការផលិតខ្សែភាពយន្ត និងការនិយមប្រើប្រាស់​បណ្តាញទំនាក់ទំនងសង្គម Facebook ជាដើម។ ជាក់ស្តែង​យើងឃើញថា យុវវ័យសព្វថ្ងៃនេះ​កំពុងតែ​ពេញនិយមខ្លាំងណាស់​នូវបទចម្រៀង Remix និងការស្លៀកពាក់ តែងខ្លួនបែប «បែកស្លុយ» ដែលខុសប្លែក​ស្រលះ​ពីកាលប្រហែល​៥ឆ្នាំមុន ដោយកាលនោះ​យុវវ័យពុំទាន់ស្គាល់​ថាអ្វីគឺ «បែកស្លុយ» នៅឡើយទេ។

«បែកស្លុយ» ពាក្យនេះ​ពុំមាននៅក្នុង​វចនានុក្រម​ភាសាខ្មែរ​របស់សម្តេច​ព្រះសង្ឃរាជ ជួន ណាត ឡើយ។ ពាក្យនេះទើបតែ​ត្រូវបានគេ​ចាប់ផ្តើមប្រើប្រាស់​ប្រហែលជា​ក្នុងឆ្នាំ២០១៣​តែប៉ុណ្ណោះ ហើយយើងខ្ញុំ​ពុំអាចរកឃើញថា​អ្នកណាជា​អ្នកចាប់ផ្តើមប្រើប្រាស់ ឬរកឃើញ​ពាក្យនេះ​មុនគេនោះឡើយ។ បើតាមប្រភព​ពីមហាជន​មួយចំនួនធំ​បាននិយាយថា ពាក្យនេះគឺកើតចេញ​មកពីក្រុមយុវវ័យ​ក្មេងៗស្ទាវ​ដែលចូលចិត្ត​ដើរលេងច្រើន ហើយបន្ទាប់មក​ក៍ត្រូវបានសាយភាយ​ចេញមកប្រើប្រាស់​ពេញសង្គមខ្មែរ​តែម្តងទៅ។ ពាក្យ «បែកស្លុយ» នេះដែរ ត្រូវបានគេប្រើប្រាស់​ក្នុងន័យហៅទៅលើក្រុមក្មេងស្ទាវណាដែលតែងតែចូលចិត្ត ដើរលេងច្រើន គេចរៀនមិនចូលសាលា ចូលឌីស្កូក្លឹប ដើរដាច់យប់ មិនចូលផ្ទះ ប្រើប្រាស់ថ្នាំញៀន ទំនើង ផឹកស្រា ពពាក់ពពូនស្រីប្រុស គ្មានសីលធម៌ ...ល...។

មានមតិមហាជន​មួយចំនួនធំ​បាននិយាយថា ពួកក្រុមក្មេងទំនើង ឬក្រុមក្មេងបែកស្លុយ​ទាំងអស់នេះហើយ ដែលគឺជាមេរោគមួយ​កំពុងបំពុលសង្គមខ្មែរ​យើងសព្វថ្ងៃ។ តើការនិយាយបែបនេះ ត្រឹមត្រូវដែរឬទេ? ឥលូវនេះ​យើងធ្វើការវិភាគ និងពិចារណាទាំងអស់គ្នា។

ទី១. តើករណីជួញដូរ និងប្រើប្រាស់គ្រឿងញៀន ភាគច្រើនកើតចេញ​ពីក្រុមមនុស្សប្រភេទណា? បើយោងតាមការចុះផ្សាយ​របស់កាសែតនានា និងរបាយការណ៍​របស់សមត្ថកិច្ច គឺភាគច្រើន​កើតចេញពី​ពួកក្រុមក្មេងទំនើង (បែកស្លុយ) ច្រើនជាងគេ។

ទី២. តើករណីចាប់រំលោភផ្លូវភេទ និងលួងលោមរួមភេទ​ជាមួយក្មេង​មិនទាន់គ្រប់អាយុ តែងតែបង្កឡើង​ដោយបុគ្គលប្រភេទណាខ្លះ? បើយោងតាមការចុះផ្សាយ​របស់កាសែតនានា និងរបាយការណ៍​របស់សមត្ថកិច្ច គឺភាគច្រើន​កើតចេញពី​ពួកក្រុមក្មេងទំនើង (បែកស្លុយ) ច្រើនជាងគេ ព្រោះក្រោយពេលដែល​ពួកគេសេពគ្រឿងញៀនរួច ពួកគេតែងតែ​មានអារម្មណ៍​ចំណង់ផ្លូវភេទខ្លាំង។ ជាពិសេសនៅពេលដែល​ពួកគេប្រុសស្រី​សេពគ្រឿងញៀន​នៅក្នុងផ្ទះសំណាក់​រួមគ្នា ពួកគេអាចនឹងប្រព្រឹត្ត​រឿងអសិលធម៌​ជាច្រើនរូបភាព។
ទី៣. តើករណីចោរកម្ម លួច ឆក់ ប្លន់ តែងតែប្រព្រឹត្ត​​ដោយបុគ្គលប្រភេទណាខ្លះ? បើយោងតាមការចុះផ្សាយ​របស់កាសែតនានា និងរបាយការណ៍​របស់សមត្ថកិច្ច គឺភាគច្រើន​កើតចេញពី​ពួកក្រុមក្មេងទំនើង (បែកស្លុយ) ច្រើនជាងគេ ព្រោះពួកគេហ៊ាន​ប្រព្រឹត្តរឿងគ្រប់បែបយ៉ាង​ទាំងអស់ នៅពេលដែល​ពួកគេគ្មានលុយទិញ​គ្រឿងញៀន​ដើម្បីប្រើប្រាស់។ ម៉្យាងទៀត​យើងអាចសង្កេត​មើលតាមការ​តុបតែងខ្លួន របស់ជនសង្ស័យនានា​ដែលប៉ូលិស​បានចាប់ខ្លួន ថាតើពួកគេ​តែងតែចូលចិត្ត​ស្លៀកពាក់បែបណា?
ទី៤. នៅពេលដែលមាន​កម្មវិធីបុណ្យផ្សេងៗ គេតែងតែឃើញ​ក្រុមក្មេងទំនើង (បែកស្លុយ) ដេញវាយ គាប់ចាក់គ្នា​ពាសវាលពាសកាល ហាក់បីដូចជា​គ្មានកោតខ្លាចនណាឡើយ។

ទី៥. បើយើងនិយាយពី​ក្មេងស្រីៗវិញ នៅពេលដែល​ពួកគាត់សេពគប់​មិត្តភក្តិ​ជាមួយក្រុមក្មេងបែកស្លុយ ពួកគាត់​ងាយនឹងទទួល​ការអូសទាញ​ខ្លាំងណាស់។ ពួកគាត់អាចប្រឈមនឹង​បញ្ហាអស់ព្រហ្មចារី លែងស្តាប់ដំបូន្មានឪពុកម្តាយ លែងខិតខំរៀន ប្រើប្រាស់គ្រឿងញៀន ខូចអនាគត…។ មិនត្រឹមតែប៉ុណ្ណោះ វាក៍ជាផ្នែកមួយ​ធ្វើអោយសីលធម៌​សង្គមខ្មែរ​ធ្លាក់ចុះផងដែរ។
មិនមែនមានតែ៥ចំណុច​ខាងលើនេះឡើយ គឺនៅមានច្រើន​ចំណុចទៀត​ដែលយើង​ពុំបានលើកយក​មកនិយាយ។ ឥលូវនេះ​ក្រោយពីយើង​លើកយកចំណុច​មួយចំនួន​មកធ្វើការវិភាគ និងពិចារណាហើយ តើអ្នកយល់ដូចម្តេចដែរ​ចំពោះក្រុមក្មេង​«បែកស្លុយ»? តើពួកគេ​គឺជាមេរោគ​បំពុលសង្គមខ្មែរយើង ដូចដែលមហាជន​មួយចំនួន​បាននិយាយដែរឬទេ? ហើយ​តើអ្នកចូលចិត្ត​ការតុបតែងខ្លួន​បែប«បែកស្លុយ» និងចូលចិត្តក្មេង​«បែកស្លុយ»ដែរឬទេ?

សម្រួលកែសម្រួលដោយ ពិភពចែករំលែក - ប្រភពខ្លឹមសារដើម Khmershow

ទស្សនារូបភាពខាងក្រោម :

 

តោះ..! សូមបញ្ចេញមតិ​ម្នាក់បន្តិចៗ​ទាំងអស់គ្នា។