ជនជាតិជប៉ុនមានជំនឿថា ស្ត្រីនឹងមានសំណាងល្អ សមបំណងក្នុងជីវិតអាពាហ៍ពិពាហ៍ ប្រសិនបើមានឱកាសបានតុបតែងឈុតកូនក្រមុំឡើងទៅអង្គុយនៅលើរូបសំណាកលិង្គដ៏ធំច្នៃពីឈើដើរដង្ហែនៅជុំវិញទីក្រុង ។ ថ្ងៃអាទិត្យទី២ ក្នុងខែមីនា ជារៀងរាល់ឆ្នាំក្រុងNagaoka តែងតែប្រារព្ធពិធីបុណ្យទាក់ទិននឹងលិង្គ ឬហៅថា ពិធីបុណ្យ«Hodare Festival» ។
ពិធីបុណ្យនោះគេដឹក ឬសែងរូបសំណាកលិង្គយក្សប្រវែង២,១ម៉ែត្រ ដង្ហែនៅលើដងផ្លូវជុំវិញក្រុង ។ រូបសំណាកលិង្គ ត្រូវគេចាត់ទុកថា ជានិមិត្តរូបនៃសំណាងល្អ ពិសេសគឺស្ត្រីដែលទើបរៀបការក្នុងរយៈពេល១២ខែ ប្រសិនបើបានតុបតែងឈុតជាកូនក្រមុំតាមទំនៀមទម្លាប់ឡើងអង្គុយពាក់កៀវលើរូបលិង្គចូលរួមក្នុងពិធីដង្ហែក្បួននឹងមានលាភសំណាងធ្វើឱ្យក្រុមគ្រួសារមានទ្រព្យសម្បត្តិស្តុកស្តម្ភ និងមានសេចក្តីសុខ ។
មហាជនដែលចូលរួមក្នុងពិធីតែងតែយកដៃស្ទាបអង្អែលរូបសំណាកលិង្គយក្ស ដើម្បីមានលាភសំណាងល្អ ធ្វើឱ្យមានទ្រព្យសម្បត្តិស្តុកស្តម្ភ និងស្នេហាមានសេចក្តីសុខជានិច្ចនិរន្តរ៍ ។ ពិធីបុណ្យរបស់ជប៉ុននោះ កើតមានតាំងពីច្រើនសតវត្សមកហើយ បច្ចុប្បន្នក្លាយជាពិធីបុណ្យមួយទាក់ទាញអ្នកទេសចរច្រើនចូលរួមទស្សនា ៕៚
World Share Posted
Source : Phorn Sophal