ដកស្រង់បន្តពី Fresh News
(កំពត)៖ បុរសជនជាតិអូស្រ្តាលី និងស្រ្តីខ្មែរសរុបទាំង២នាក់ ដែលជំនាញខាងចែកចាយគ្រឿងញៀន នៅខេត្តកំពតនោះ នៅពេលនេះត្រូវបានកម្លាំងនគរបាលស្រាវជ្រាវតាមបង្ក្រាបបាន ដោយដកហូតថ្នាំញៀនជាក់ស្តែងជាច្រើនផងដែរ។
ស្នងការនគរបាលខេត្តកំពតលោកឧត្តមសេនីយ៍ទោ ម៉ៅ ច័ន្ទមធុរិទ្ធ បានថ្លែងប្រាប់អង្គភាពព័ត៌មាន Fresh News ថា នៅរសៀលថ្ងៃទី១៥ ខែធ្នូ ឆ្នាំ២០១៧នេះ ប្រតិបត្តិការនេះ ចុះបង្ក្រាបករណីចែកចាយ និងប្រើប្រាស់គ្រឿងញៀន ពីសំណាក់កម្លាំងអន្តរាគមន៍ពិសេស សហការជាមួយកម្លាំងអធិការដ្ឋានក្រុងកំពត ធ្វើឡើងនៅភូមិសុវណ្ណសាគរ សង្កាត់កំពង់កណ្តាល ក្រុងកំពត។
លោកឧត្តមសេនីយ៍សុ្នងការបានបញ្ជាក់ទៀតថា ជាលទ្ធផលកម្លាំងនគរបាលបានឃាត់ខ្លួនជនសង្ស័យជនជាតិអូរស្ត្រាលីម្នាក់ឈ្មោះ KNOWLES GARY ROBERT អាយុ៧២ឆ្នាំ និងស្ត្រីជនជាតិខ្មែរម្នាក់ ព្រមទាំងដកហូតថ្នាំញៀនចំនួន០៦កញ្ចប់ធំ, ថ្នាំគ្រាប់យ៉ាម៉ាចំនួន០៥គ្រាប់កន្លះ និងថ្នាំសម្រើបចំនួន០៩ប្រអប់។
នៅពេលនេះជនសង្ស័យទាំង២នាក់ ត្រូវបានកម្លាំងនគរបាលជំនាញរបស់លោក កំពុងធ្វើការសួរនាំបន្តនៅស្នងការដ្ឋាននគរបាលខេត្ត ដើម្បីចាត់ការតាមច្បាប់៕
