រាជធានីភ្នំពេញ : ក្រោយទទួលមរណភាព នៅរសៀលថ្ងៃទី០៤ ខែមិថុនា ឆ្នាំ២០១៧ម្សិលមិញ សពលោក អ៉ិត សេដ្ឋា ពិធីករមានប្រជាប្រិយភាពល្បីឈ្មោះ ប្រចាំស្ថានីយទូរទស្សន៍ប៉ុស្តិ៍ CTN នឹងត្រូវបូជានៅវេលាម៉ោង៤៖០០នាទីរសៀល ថ្ងៃចន្ទ ទី០៥ ខែមិថុនា ឆ្នាំ២០១៧នេះ ក្នុងវត្តឧត្តរាវត្តី ស្ថិតសង្កាត់គីឡូម៉ែត្រលេខ៦ ខណ្ឌឫស្សីកែវ ។ ដោយនៅវេលាម៉ោងប្រមាណ២រសៀល ក្រុមការងារ
ស្ថានីយ៍វិទ្យុABC ដឹកនាំដោយកញ្ញា កាច្រឹប បានទៅចូលរួមគោរពវិញ្ញាណក្ខន្ធសពលោកពូ អ៊ិត សេដ្ឋា និងចូលរួមរំលែកទុក្ខផងដែរ។
លោក សុវណ្ណ រិទ្ធី បានប្រាប់ថា តាំងពីព្រឹករហូតដល់ពេលនេះ (ម៉ោង១២ថ្ងៃត្រង់) មានបងប្អូនសិល្បករ ប្រជាពលរដ្ឋ និងញាតិមិត្តជិតឆ្ងាយ បានចូលរួមពិធីបុណ្យសពយ៉ាងច្រើនកុះករ។ ហើយលោកក៏បានថ្លែងអំណរគុណជំនួសគ្រួសារសព ចំពោះអ្នកចូលរួមទាំងអស់ផងដែរ។
សូមជម្រាបថា លោក អ៉ិត សេដ្ឋា បានទទួលមរណភាព ក្រោយពេលបញ្ជូនទៅសង្គ្រោះបន្ទាន់នៅមន្ទីរពេទ្យរុស្ស៊ី នៅព្រឹកថ្ងៃទី៤ ខែមិថុនាម្សិលមិញ។
បើទោះបីជាមានការយកចិត្តទុកដាក់ និងទំនុកបម្រុង ជ្រោមជ្រែងយ៉ាងខ្លាំងពី សំណាក់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមជាមួយនឹងសប្បុរជនជាច្រើនក្តី ក៏មិនអាចជួយសង្គ្រោះជីវិតរបស់លោក អ៉ិត សេដ្ឋា បានដែរ ដោយសារស្ថានភាពជំងឺ ស្ថិតក្នុងដំណាក់កាលធ្ងន់ធ្ងរបំផុត៕
លោកអ៊ិត សេដ្ឋា បានទទួលមរណភាពហើយក្នុងវ័យ៤៧ឆ្នាំ ។ មរណភាពរបស់លោក កាលពីរសៀលថ្ងៃទី០៤ មិថុនា ២០១៧ ស្ថិតនៅមន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្សី ។
ពេញមួយព្រឹកថ្ងៃ៤ មិថុនា មហាជន និងសិល្បករជាច្រើនបានទៅមើលលោកអ៊ិត សេដ្ឋា នៅមន្ទីរពេទ្យ ។ អ្នកសិល្បៈមានលោកសាយ រតនៈ, លោកតាវិចទ័រ, នាយពែកមី, លោកហម ឈរ៉ា, អ្នកនាងខាត់ សុឃីម, ឌួង ហ្សូរីដា និងក្រុមបុគ្គលិកកម្មវិធី «មន្តស្នេហ៍សំនៀង» ជាដើម ។
ចំណែកលោក ហ៊ុន ម៉ាណែត និងភរិយាបានឱ្យក្រុមការងារទៅមន្ទីរពេទ្យ និងជួយឧបត្ថម្ភប្រាក់២០លានរៀល ។ ក្រៅពីនេះមានសប្បុរសជនជាច្រើនបានជួយឧបត្ថម្ភដែរ ។ លោកសាយ រតនៈ ពិធីករក្នុងកម្មវិធី«រាត្រីកម្សាន្ត»ប្រចាំទូរទស្សន៍ស៊ីធីអិន ដែលសិ្នទ្ធបំផុតជាមួយលោកអ៊ិត សេដ្ឋា ខ្នះខ្នែងប្រកាសរកជំនួយពីសប្បុរសជនជាមួយសិល្បករដទៃទៀត ។
លោករៀបរាប់ថា លោកអ៊ិត សេដ្ឋា រស់នៅផ្ទះជួលប្រមាណ៥ ទៅ៦ឆ្នាំមកហើយ ។ លោករកប្រាក់បានមួយភាគធំយកទៅសងធនាគារ និងសល់តិចតួចផ្គត់ផ្គង់ជីវភាពគ្រួសារ ។
លោកមិនដែលឱ្យរឿងនេះ ដឹងដល់អ្នកណាទេ ។ លោកនៅធ្វើការក្នុងទឹកមុខធម្មតា សូម្បីតែលោករតនៈ និងលោកតាវិចទ័រ ធ្លាប់ទៅញ៉ាំបាយនៅផ្ទះជួលនោះ ក៏លោកសេដ្ឋាផ្តាំមិនឱ្យប្រាប់គេដឹងដែរ ។
លោកសេដ្ឋា តស៊ូបំពេញការងារស្ទើរតែគ្មានអ្នកណាដឹងកម្រិតជីវភាពលោកបែបណាទេ ។ លោកអ៊ិត សេដ្ឋា មានកូនបីនាក់ប្រុសមួយ ស្រីពីរ ក្នុងនោះកូនស្រីច្បងអាយុ១៨ ឯកូនប្រុសទី២ពិការ ។ លោកអ៊ិត សេដ្ឋា បានបែកបាក់ភរិយាជាយូរមកហើយ ។
ដោយសារតែជីវភាពដុនដាបលោកជួលផ្ទះល្វែងស្នាក់នៅបានមួយរយៈ ប៉ុន្ដែដោយជាប់បំណុលធនាគារច្រើនពេក លោកក៏ប្តូរទៅនៅបន្ទប់ជួលតូចមួយរហូតមកទល់ពេលនេះដើម្បីសន្សំលុយដោះបំណុលធនាគាររាល់ខែ ។ លោកអុិត សេដ្ឋា ស្ពឹកជើងដើរមិនរួច និងត្រូវគេបញ្ជូនទៅកាន់មន្ទីរពេទ្យជាបន្ទាន់ ។
គ្រូពេទ្យពិនិត្យឃើញថា លោកសេដ្ឋាធ្លាក់ចុះឈាមរហូតដល់៧ ធ្វើឱ្យលោកហេវហត់អស់កម្លាំងខ្លាំង ។
អតីតភរិយារបស់លោកអ៊ិត សេដ្ឋា អះអាងប្រាប់កោះសន្តិភាព តាមទូរស័ព្ទនៅព្រឹកថ្ងៃទី៤ ខែមិថុនា ២០១៧ថា ក្រោយពីសម្រាកព្យាបាលនៅមន្ទីរពេទ្យមួយមក ស្វាមីរបស់អ្នកស្រីបានវិលត្រឡប់ទៅកាន់គេហដ្ឋានវិញ ដោយមិនបន្តស្នាក់នៅក្នុងមន្ទីពេទ្យទេ ។ បន្ទាប់ពីការពិនិត្យពីក្រុមគ្រូពេទ្យ លោកអុិត សេដ្ឋា មិនមានអ្វីប៉ះពាល់ទៅដល់បេះដូង ថ្លើម ឡើយ ប៉ុន្តែបានស្តែងឱ្យដឹងពីការកើតមានជំងឺគ្រុនពោះវៀនទៅវិញ ។ លោកអុិត សេដ្ឋា អាចនៅបន្តការហូបអ្វីបានជាធម្មតា ប៉ុន្តែឈាមនៅតែមិនស្រក និងឡើងអ្វីឡើយ ខណៈពេលដែលជើងមួយចំហៀងរបស់លោកនៅតែបន្តហើម ។
បើតាមអ្នកស្រីជាអតីតភរិយាថា រយៈពេលពេញមួយថ្ងៃ លោកអុិត សេដ្ឋា កើតមានអាការគ្រុនរងាក្តៅ និងបន្តហើមជើងដដែល ទើបក្រុមគ្រួសារ និងក្រុមការងាររបស់ស្ថានីយទូរទស្សន៍ស៊ីធីអិន ឱ្យលោកសម្រាកព្យាបាលនៅមន្ទីរពេទ្យរុស្ស៊ី ។
អតីតភរិយារបស់លោកអ៊ិត សេដ្ឋា បញ្ជាក់ថា កន្លងមកស្វាមីរបស់អ្នកស្រីមានជំងឺ ផ្សេងៗ ប៉ុន្តែមិនសូវជាធ្វើទុក្ខអ្វីគួរឱ្យកត់សម្គាល់ឡើយ ហើយលោកនៅតែបន្តការងារជាធម្មតា។
ប៉ុន្តែក្នុងរយៈពេលចុងក្រោយនេះ លោកបានចូលរួមឃោសនារកសំឡេងឆ្នោត ដូច្នេះលោកឈរច្រើនជាងអង្គុយ ទើបបណ្តាលឱ្យមានបញ្ហានេះឡើង ។ អាការជំងឺរបស់លោកអុិត សេដ្ឋា ដែលកើតឡើងនេះ គឺមួយផ្នែកក៏ដោយសារតែលោកពិសាស្រា និងបារីច្រើន ទើបបណ្តាលឱ្យលោកប្រែប្រួលទៅជាស្គម និងខ្មៅជាងមុន ។
