រាជធានីភ្នំពេញ ៖ កាលពីវេលាម៉ោង១១:៣០នាទីយប់ ថ្ងៃទី១១ ខែសីហា ឆ្នាំ២០១៧ នេះ រាជរដ្ឋាភិបាលកម្ពុជា បានបញ្ជួនកងទ័ព និងសញ្វវុធមួយចំនួន ចេញពីមូលដ្ឋាននៅក្រុងតាខ្មៅឆ្ពោះទៅភូមិភាគឥសាន្តនៃប្រទេស ឆ្ពោះទៅសមរភូមិជួរមុខ ក្នុងខេត្តស្ទឹងត្រែង ដើម្បីកាពារ និងបណ្តេញចោរឈ្លានពានទឹកដីកម្ពុជា ។
សេចក្តីប្រកាសព័ត៌មានរបស់សាលារាជធានីភ្នំពេញ នៅល្ងាចថ្ងៃទី១១ ខែសីហា ឆ្នាំ២០១៧ បានជូនដំណឹងដល់បងប្អូនប្រជាពលរដ្ឋទាំងអស់មេត្តាជ្រាបថា ៖ នៅពេលវេលាបន្តិចទៀតនេះ នឹងមានការចល័តកងទ័ព និងសព្វាវុធមួយចំនួន ចេញពីមូលដ្ឋាននៅក្រុងតាខ្មៅ ឆ្ពោះទៅភូមិភាគឥសាន្តនៃប្រទេស ដោយត្រូវឆ្លងកាត់ផ្លូវមួយចំនួនភូមិសាស្ត្ររាជធានីភ្នំពេញ រួមមានផ្លូវជាតិលេខ២ មហាវិថីព្រះនរោត្តម ស្ពានជ្រោយចង្វារ និងផ្លូវជាតិលេខ៦ ។ សូមបងប្អូនប្រជាពលរដ្ឋទាំងអស់មេត្តាជ្រាប និងសូមកុំមានការភ្ញាក់ផ្អើលចំពោះការចល័តកងទ័ពសំដៅទៅការពារទឹកដីនៅសមរភូមិមុខ ។
ការបញ្ជួនទ័ពទៅកាន់សមរភូមិមុខនេះ បានធ្វើឡើងបន្ទាប់ពីប្រទេសឡាវ បញ្ជួនទាហានមកចូលទឹកដីកម្ពុជា នៅតំបន់ក្បែរអូរអាឡៃ និងអូរតាង៉ាវ ព្រំដែនខេត្តស្ទឹងត្រែង និងខេត្តអាតាពឺ របស់ឡាវ ។ ជាមួយកាផ្គើនរបស់ទាហានឡាវនេះដែរ កាលពីព្រឹកថ្ងៃទី១១ ខែសីហា ឆ្នាំ២០១៧ នៅក្នុងពិធីប្រកាសផ្ទេរភារកិច្ចថ្នាក់ដឹកនាំរាជបណ្ឌិតសភាកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានទុកពេល៦ថ្ងៃឲ្យឡាវដកទ័ពចេញពីទឹកដីកម្ពុជា នៅក្នុងខេត្តស្ទឹងត្រែង ហើយការកំណត់ពេលនេះ បន្ទាប់ពីលិខិតរបស់ សម្តេច បានផ្ញើទៅនាយករដ្ឋមន្ត្រីឡាវ តែមិនមានការឆ្លើយតបវិញ ។
ទន្ទឹមនឹងការប្រកាសដាក់ឱសានវាទឲ្យឡាវដកទ័ពនេះ ហើយនៅថ្ងៃនេះទី១២ សម្តេចតេជោ នឹងជិះយន្តហោះទៅកាន់ប្រទេសឡាវ ដើម្បីពិភាក្សារឿងដកទ័ពនេះផងដែរ និងបានបញ្ជាមេទ័ពឲ្យត្រៀមកម្លាំងទៅបណ្តេញកងទ័ពឡាវចេញពីប្រទេសកម្ពុជាផងដែរ ។ សម្តេចតេជោ ហ៊ុន សែន ក៏បានបញ្ជាទៅអភិបាលខេត្តស្ទឹងត្រែង ឲ្យទៅជួបអភិបាលខេត្តឡាវ រឿងដកទ័ពនេះ និងក៏បានបញ្ជាទៅមេទ័ពកម្ពុជាឲ្យត្រៀមកម្លាំងទៅបណ្តេញកងទ័ពឡាវចេញពីប្រទេសកម្ពុជាផងដែរ ។
សម្តេចបានបញ្ជាក់ថា ៖ សម្តេចបានបញ្ជាទៅរដ្ឋមន្ត្រីការពារជាតិ សម្ដេច ទៀ បាញ់, នាយឧត្តមសេនីយ៍ ប៉ុល សារឿន, នាយឧត្តមសេនីយ៍ គន់ គីម រួចហើយ នឹងបើមានសភាពការណ៍យ៉ាងណា កុំបន្ទោសកម្ពុជាឲ្យសោះ ព្រោះសម្តេចបានទាំងហៅតាមទូរស័ព្ទ និងផ្ញើសំបុត្ររួចហើយ ។
សម្តេចតេជោក៏បានអំពាវនាវដល់ប្រជាពលរដ្ឋខ្មែរ កុំឲ្យមានការភ្ញាក់ផ្អើល ប្រសិនបើឃើញមានការចល័តទ័ព ព្រោះទ័ពទាំងនោះ ត្រូវចល័តទៅកាន់ខេត្តស្ទឹងត្រែង ដើម្បីបណ្តេញទ័ពឈ្លានពានចេញពីដីកម្ពុជា ។ សម្តេចតេជោ ហ៊ុន សែន បានថ្លែងទៅកាន់ភាគីឡាវថា មិត្តភក្តិជារឿងមិត្តភក្តិ តែមិនអាចឲ្យមិត្តភក្តិមកជាន់ក្បាល ខ្មែរ នោះទេ ។ សម្តេចតេជោ ហ៊ុន សែន បានបញ្ជាក់ថា សម្តេចបានចាត់ចែងមេទ័ពខ្មែររួចអស់ហើយ ឲ្យត្រៀមលក្ខណៈសម្បត្តិបណ្តេញទ័ពឡាវចេញពីដីខ្មែរ ។
យ៉ាងណាក៍ដោយ មកទល់នឹងរសៀលម្សិលមិញ មិនទាន់មានការផ្ទុះអាវុធនៅឡើយទេ យោធានៅព្រំដែនខ្មែរ-ឡាវ មានភាពតានតឹងខ្លាំង តែមិនទាន់ផ្ទុះអាវុធដាក់គ្នានោះ កងយោធពលខេមរភូមិន្ទ ត្រូវបានបញ្ជូនបន្ថែមទៅកាន់ខេត្តស្ទឹងត្រែង ទីដែលទាហានឡាវចូលមកឈ្លានពានបូរណភាពទឹកដី និងអធិបតយ្យជាតិខ្មែរ ។
ចំណែកអ្នកនាំពាក្យក្រសួងការពារជាតិកម្ពុជា នាយឧត្តមសេនីយ៍ ឈុំ សុជាតិ បានថ្លែងប្រាប់បណ្តាញព័ត៌មាន ឱ្យដឹងនៅព្រឹកថ្ងៃទី១១ ខែសីហា ឆ្នាំ២០១៧នេះថា ៖ កងយោធពលខេមរភូមិន្ទ បានត្រៀមខ្លួនរួចជាស្រេចហើយ ក្នុងការប្រឈមមុខតទល់ជាមួយភាគីឡាវ ដោយរង់ចាំបទបញ្ជាពីថ្នាក់កំពូលតែប៉ុណ្ណោះ ។ នាយឧត្តមសេនីយ៍ ឈុំ សុជាតិ បានបញ្ជាក់ថា កងយោធពលខេមរភូមិន្ទ មានភារកិច្ចការពារទឹកដីកម្ពុជា មិនឱ្យបាត់បង់ ។ កងយោធពលខេមរភូមិន្ទ សូមរកក្សាសិទ្ធិការពារនូវបូរណភាពទឹកដីរបស់ខ្លួន ហើយប្រឆាំងដាច់ខាតនូវការរំលោភពបំពានណាមួយមកលើទឹកដីកម្ពុជា ។
សូមបញ្ជាក់ថា ចាប់តាំងពីខែកុម្ភៈ ឆ្នាំ២០១៧ មក យោធាកម្ពុជា និងឡាវ ធ្លាប់បានប្រឈមមុខគ្នាជាថ្មី បន្ទាប់ពីភាគីឡាវ បានចេញមកទប់ស្កាត់គ្រឿងចក្ររបស់ភាគីកម្ពុជា ដែលឈូសឆាយដើម្បីធ្វើផ្លូវតាមខ្សែក្រវ៉ាត់ព្រំដែនកម្ពុជា-ឡាវ ដែលស្ថិតនៅក្នុងទឹកដីខេត្តស្ទឹងត្រែង ប្រទេសកម្ពុជា ។ ប៉ុន្តែការប្រឈមមុខគ្នានេះ បានស្ងប់ស្ងាត់ទៅវិញ បន្ទាប់ពីមានការសម្របសម្រួលដោយភាគីទាំងពីរនៅតំបន់នោះ ។ ទោះជាយ៉ាងនេះក្តី ក៏ភាគីកងទ័ពឡាវ នៅមិនទាន់ដកទ័ពចេញពីព្រំដែន ក្នុងទឹកដីកម្ពុជានៅឡើយទេ ។
