សូមបងប្អូនជៀសឲ្យឆ្ងាយពីគ្រឿងញៀន!
គ្រឿងញៀន និងបំផ្លាញជីវិតអ្នក គ្រួសាររបស់អ្នក ព្រមជាមួយ និងសង្គមរបស់អ្នក!
រាជធានីភ្នំពេញ ៖ លោកវរសេនីយ៍ត្រី ម៉េង វិមានតារ៉ាអធិការរងខណ្ឌមានជ័យ ទទួលបន្ទុកយុត្តិធម៌ ដឹកនាំកម្លាំងបង្ក្រាបករណីជួញដូរគ្រឿងញៀន ខុសច្បាប់០២ ករណីផ្សេងគ្នា នៅទឹកដីខណ្ឌមានជ័យ យប់ថ្ងៃទី០៧ ខែ វិច្ឆិកា ឆ្នាំ២០១៧ ។
ករណីទី១ | វេលាម៉ោង២០:៣៥នាទីយប់ ថ្ងៃទី០៧ ខែវិច្ឆិកា ឆ្នាំ២០១៧នេះ កម្លាំងនគរបាលប៉ុស្តិ៍ស្ទឹងមានជ័យទី២ បានសហការជាមួយកម្លាំងនគរបាលខណ្ឌមានជ័យ ធ្វើការល្បាតពួនស្ទាក់នៅក្នុងមូលដ្ឋាន ហើយនៅពេលមកដល់ ផ្ទះជួលគ្មានលេខ ផ្លូវលំ ភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ក៏បានឃាត់ខ្លួនជនសង្ស័យចំនួន ០២ នាក់ ពីបទជួញដូរនិងប្រើប្រាស់ដោយខុសច្បាប់នូវសារធាតុញៀន ដែលមានឈ្មោះ ៖ ១-ឈ្មោះ ចាយ សុភ័ត្រ្តា ភេទ ប្រុស អាយុ ៣៤ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅផ្ទះជួលគ្មានលេខ ផ្លូវលំ ភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
២-ឈ្មោះ វង់ សុខលីន ភេ ប្រុស អាយុ ៤០ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅផ្ទះជួលគ្មានលេខ ផ្លូវលំ ភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
ក្នុងនោះយើងបានដកហូតវត្ថុតាងមាន៖ក្រាមពណ៍សថ្លា(សង្ស័យជាគ្រឿងញៀន) ចំនួន ០២ កញ្ចប់ថង់តូច, សំបកថង់ប្លាស្ទិចមួយចំនួន , ឧបករណ៍សម្រាប់ជក់គ្រឿងញៀនមួយចំនួន និង ទូរស័ព្ទដៃចាស់០១គ្រឿង ។ បច្ចុប្បន្នជនសង្ស័យឈ្មោះ ចាយ សុភ័ត្រ្តា និង ឈ្មោះ វង់ សុខលីន ឃាត់ខ្លួននៅអធិការដ្ឋាន ដើម្បីកសាងសំណុំរឿង ។
ករណីទី២ | វេលាម៉ោង២១:០០នាទីយប់ ថ្ងៃទី០៧ ខែវិច្ឆិកា ឆ្នាំ២០១៧នេះ កម្លាំងនគរបាលប៉ុស្តិ៍ចាក់អង្រែលើ បានសហការជាមួយកម្លាំងនគរបាលខណ្ឌមានជ័យ ធ្វើការល្បាតពួនស្ទាក់នៅក្នុងមូលដ្ឋានសង្កាត់ចាក់អង្រែលើ ហើយនៅពេលមកដល់វាលខ្សាច់ មុខផ្ទះគ្មានលេខ ផ្លូវ៦០ម៉ែត្រ ក្រុមទី៨ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក៏បានឃាត់ខ្លួនជនសង្ស័យចំនួន ០១នាក់ ពីបទជួញដូរដោយខុសច្បាប់នូវសារធាតុញៀន ដែលមានឈ្មោះ សា កុលស៊ីម ហៅ សង្ហា ភេទប្រុស អាយុ ២៧ឆ្នាំ ជនជាតិខ្មែរឥស្លាម មុខរបរមិនពិតប្រាកដ ទីលំនៅផ្ទះជួល ផ្លូវលំ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។ ក្នុងនោះយើងបានដកហូតវត្ថុតាងមាន៖ក្រាមពណ៍សថ្លា(សង្ស័យជាគ្រឿងញៀន)ចំនួន ១៥ កញ្ចប់ថង់តូច។ បច្ចុប្បន្នជនសង្ស័យឈ្មោះ សា កុលស៊ីម ឃាត់ខ្លួននៅអធិការដ្ឋាន ដើម្បីកសាងសំណុំរឿង ។
